2019 թվականը ՅՈՒՆԵՍԿՕ-ի որոշմամբ հայտարարված է ամենայն հայոց բանաստեղծ Հովհաննես Թումանյանի և երգահան, խմբակավար, բանահավաք, մեծն Կոմիտասի ծննդյան 150-ամյակին նվիրված հոբելյանական տարի: Այդ առիթով ողջ Հայաստանում, ինչպես նաև Արցախում կազմակերպվում են բազմաթիվ միջոցառումներ:
Մարտի 22-ին Արցախի Ժողովրդավարական կուսակցության նախաձեռնությամբ, մշակույթի և երիտասարդության պալատում կայացավ պատանի նկարիչների նկարների ցուցահանդեսի բացումը՝ նվիրված Հ. Թումանյանի ստեղծագործություններին: Միջոցառմանը մասնակցել են քաղաքի հանրակրթական բոլոր դպրոցների երեխաները: Մրցույթը հայտարարվել էր փետրվարի 10-ին:
Ժյուրիի կողմից գնահատվեցին աշխատանքները և ըստ այդմ 120 աշխատանքից 10-ը արժանացան խրախուսանքի, իսկ 6-ը՝ մրցույթային տեղերի, որոնք ստացան պատվոգրեր և նվերներ:
Միջոցառմանը ներկա էին ԱՀ ԱԺ պատգամավորներ Գ. Ստեփանյանը, Լ. Բարսեղյանը, «Գյուրջյան» կիրառական արվեստի ինստիտուտի ռեկտոր, արվեստի վաստակավոր գործիչ, նկարիչ-քանդակագործ պրոֆեսոր Յու. Հովհաննիսյանը, նկարիչներ Է. Մկրտչյանը, Հ. Մնացականյանը, ԱԺԿ գրասենյակի աշխատողներ, ուսուցիչներ, ծնողներ:
Ժյուրիի նախագահ Յու. Հովհաննիսյանը շնորհակալություն հայտնեց կազմակերպիչներին և բարձր գնահատեց երեխաների աշխատանքները՝ դրանք անվանելով «մանկական հոգիների առաջին հաղթանակ»: