Երեխաների պաշտպանության միջազգային օրը սահմանվել է 1925թ.-ին` Ժնևում երեխաների պաշտպանության համար հրավիրված համաշխարհային կոնֆերանսի ընթացքում:
1949թ. Կանանց ժողովրդավարական միջազգային դաշինքը երեխաների պաշտպանության օր անցկացնելու որոշում է ընդունել: ՄԱԿ-ը, հավանություն տալով այս նախաձեռնությանը` հայտարարեց երեխաների կյանքի և առողջության պաշտպանության հարցը իր գործունեության գերակա ուղղություններից մեկը:
Առաջին անգամ հունիսի 1-ը նշվել է որպես երեխաների պաշտպանության միջազգային օր 1950թ. -ին:
Այսօր, հունիսի 1-ին Հայաստանի և Արցախի տարբեր մարզերում բազմաթիվ միջոցառումներ են կազմակերպվում երեխաների համար:
Արցախի Ժողովրդավարական կուսակցության կանանց խորհրդի երիտասարդական թևի նախաձեռնությամբ մի խումբ ԱԺԿ անդամներ` նախագահ Սուսաննա Ավշառյանի գլխավորթությամբ, այցելեցին Ստեփանակերտի «Արևիկ» մանկական հիվանդանոց` երեխաներին շնորհավորելու նպատակով:
Երեխաներին հյուր էին եկել տարբեր մուլտհերոսներ և ծաղրածուներ, որոնք էˊլ ավելի տոնական դարձրին օրը: Երեխաները բարձր տրամադրությամբ ասմունքեցին , երգեցին ,պարեցին և բնականաբար նվերներ ստացան բացառապես բոլոր-բոլորը: Իսկ տիկին Ավշառյանի կազմակերպած խաղերն այնքան հետաքրքիր ու զվարճալի էին, որ նույնիսկ բուժաշխատողները միացան երեխաներին : «-Օրը երեխաներինն է, դարձնենք այն տոն »,- նշեց կուսակցության կանանց խորհրդի նախագահը:
Այսօր աշխարհում քիչ չեն դեպքերը, երբ երեխաները ենթարկվում են շահագործման, որն արտահայտվում է տարբեր ձևերով` տանը աշխատանքի միջոցով, հարկադրաբար փողոցում մուրացկանությամբ զբաղվելով …
Ուստի փորձենք երեխաների համար այս օրը տոն դարձնել` գունավորելով նրանց մանկությունը, լցնել քաղաքը ուրախ ճիչերով ու ծիծաղով: Չէ՞ որ այսօրը և բոլորիս ապագան երեխաներին են պատկանում:
