Եթե չասենք,որ կինն արևից է ստեղծվել, ապա պետք է ասենք, որ կնոջ առեղծվածների ակունքն արևն է: Կինն արևից է առել վառելու, վառվելու, կայծակելու հզոր կարողությունը:
Արցախի Ժողովրդավարական կուսակցությունը շարունակում է իր ուշադրության կենտրոնում պահել, գնահատել ու մեծարել հայոց կանանց:
Ապրիլի 4-ին ԱԺԿ կենտրոնական գրասենյակի նիստերի դահլիճում ԱԺԿ գրասենյակի և կանանց խորհրդի նախաձեռնությամբ կազմակերպվեց միջոցառում` նվիրված գարնանային տոներին: Միջոցառմանն ներկա էին տարբեր սերունդների և բնագավառների կին-ներկայացուցիչներ: Ոմանք հանդես եկան իրենց շնորհավորանքի խոսքերով, իսկ ոմանք երգով ու արտասանությամբ էˊլ ավելի գեղեցկացրին ու տոնական շունչ պարգևեցին ներկաներին:
Կանանց միջազգային օրը հասարակ կանանց պայքարի պատմությունն է: Դա մի օր է, որ պատմում է հասարակության մեջ տղամարդկանց հետ հավասար իրավունքներ ունենալու, հավասար պայմաններում աշխատելու և հասարակական կյանքին ակտիվ մասնակցություն ունենալու համար կանանց մղած պայքարի մասին:
Սակայն մի բան է կին լինել, և այլ բան է ՀԱՅ կին լինելը, որովհետև
հայ կինն ի սկզբանե, և երևի բնազդաբար, ավելի շատ հակված է եղել իր մայրական դերը լի ու լի կատարելու, իր կյանքը ինքնամոռաց նվիրաբերելու իր զավակներին ու նաև իր ժողովրդին, քանզի պատմության մութ ու դժնդակ ժամանակահատվածներում, երբ ընտանիքի հայրը ստիպված է եղել հայրենի հողը պաշտպանելու, հայ մայրն է տիրություն արել իր ընտանիքին` ցուցաբերելով գերմարդկային զոհողություններ:
Միջոցառման ընթացքում կանայք ու մեր երիտասարդները ևս մեկ անգամ մեծարեցին հայ կնոջը, իսկ մեծարել հայ կնոջը նշանակում է մեծարել ազգը: