Արցախի ժողովրդավարական կուսակցության նախագահ Աշոտ Ղուլյանը մայիսի 1-ին ընդունել է Ֆրանսիայի Ազգային ժողովի պատգամավոր, Ֆրանսիա-Արցախ բարեկամության շրջանակի ղեկավար Ֆրանսուա Ռոշբլուանի գլխավորած պատվիրակությանը, որն Արցախ է ժամանել մայիսի 3-ի խորհրդարանական ընտրություններին դիտորդական առաքելություն իրականացնելու նպատակով:
Ողջունելով հյուրերին՝ ԱԺԿ նախագահը կարևորել է ֆրանսիացի օրենսդիրների դիտորդական առաքելության նշանակությունը՝ Արցախի հերթական ժողովրդավարական ընտրությունների մասին միջազգային հարթակներում լիարժեք տեղեկատվություն հաղորդելու համատեքստում:
ԱԺԿ նախագահը նույն օրը հանդիպել է նաև ԱՄՆ-ից ժամանած դիտորդների պատվիրակության անդամներին: Պատասխանելով ամերիկացի դիտորդների հարցերին՝ Աշոտ Ղուլյանը պարզաբանումներ է տվել հանրապետության ընտրական համակարգի, Արցախի ժողովրդավարական կուսակցության գործունեության, նախընտրական քարոզարշավի կազմակերպման մասին:
