Ապրիլի 10-ին Ստեփանակերտի մշակույթի և երիտասարդության պալատի մեծ դահլիճում կայացավ Արցախի Ժողովրդավարական կուսակցության կանանց խորհրդի «Արցախյան տատիկներ» ակումբի գրական- գեղարվեստական թատերականացված միջոցառման առաջնախաղը` նվիրված արցախահայության ազգային-ազատագրական պայքարի` Ղարաբաղյան շարժման 30-ամյակին:
Միջոցառմանը ներկա էին Ազգային ժողովի և Արցախի Ժողովրդավարական կուսակցության Կենտրոնական խորհրդի նախագահ Ա. Ղուլյանը, կրթության, գիտւթյան և սպորտի նախարար Ն. Աղաբալյանը, մշակույթի, երիտասարդության հարցերի և զբոսաշրջության նախարար Ս. Շահվերդյանը, ԱԺ պատգամավորներ, հյուրեր:
Բեմում Արցախի ազգային տարազով հանդես եկան տարբեր մասնագիտությունների տեր երեք սերնդի ներկայացուցիչներ` այաներ, տատիկներ և հարսեր:
Ծրագիրը համեմված էր զուտ Արցախի բարբառով ստեղծագործություններով և մեծ արցախցի Գ. Գաբրիելյանի հեղինակած խաղիկներով և երգերով:
Նշենք նաև, որ ամբողջ ելույթը ուղեկցվում էր տեսահոլովակներով` Արցախյան շարժումից :
Ելույթը ջերմությամբ ընդունվեց հանդիսատեսի կողմից և արժանացավ բուռն ծափահարությունների: