2017թ. հունիսի 23-ին Արցախի Ժողովրդավարական կուսակցության կենտրոնական գրասենյակում տեղի ունեցավ ԱԺԿ Կենտրոնական խորհրդի նիստ, որը վարում էին ԱԺԿ ԿԽ նախագահ Աշոտ Ղուլյանը և Ստեփանակերտի քաղաքապետ, ԱԺԿ ԿԽ նախագահի տեղակալ Սուրեն Գրիգորյանը:
Ընդլայնված նիստին Կենտրոնական խորհրդի անդամներից բացի հրավիրված էին տարածքային կառույցների ղեկավարներ, վերստուգիչ հանձնաժողովի անդամներ, «Ժողովրդավարություն» խմբակցության անդամներ, Կանանց խորհրդի, ինչպես նաև ԱԺԿ երիտասարդական թևի ներկայացուցիչներ:
Օրակարգը հաստատելուց հետո սկսվեցին քննարկումները: Կարևորվեց Արցախի Ժողովրդավարական կուսակցության Կենտրոնական խորհրդի 2017թ. գործունեութունը: Աշոտ Ղուլյանը հակիրճ ներկայացրեց V համագումարի նախապատրաստական աշխատանքները, ուշադրություն դարձրեց բացթողումների և խնդիրների վրա, ընդգծեց կուսակցության կանանց խորհրդի և երիտասարդական թևի ակտիվ գործունեությունը:
ԿԽ նիստում քննարկվեց նաև V համագումարի պատվիրակների կազմի ներկայացուցչական նորմը:
Հաստատվեց համագումարի նախապատրաստական աշխատանքների կազմկոմիտեի կազմը` կոնկրետ հանձնարարականներով:
«Ժամանակը փոխվում է, խնդրի լուծման կուլտուրան էլ է փոխվում: Կուսակցական գործունեությունը միշտ էլ թարմացման կարիք ունի, պետք է անընդհատ նորացվի ԿԽ աշխատելաոճը և շարժվել առաջ…», – կարևորեց Ա. Ղուլյանը:
Նիստում ծավալված մտքերի փոխանակությունից հետո ներկաները հանդես եկան տարբեր առաջարկություններով: ԱԺԿ հերթական V համագումարի օր հաստատվեց ս.թ. հուլիսի 1-ը:
