Մայիսի 24-ին ԱԺ նիստերի մեծ դահլիճում ԼՂՀ Ազգային ժողովի նախագահ, «Ղարաբաղ-Ֆրանսիա» բարեկամության շրջանակի ղեկավար Աշոտ Ղուլյանն ընդունել է «Ֆրանսիա-Ղարաբաղ» բարեկամության շրջանակի նախագահ, Ֆրանսիայի Ազգային ժողովի պատգամավոր Ֆրանսուա Ռոշբլուանին և «Ֆրանսիա-Հայաստան» բարեկամության խմբի նախագահ Ռենե Ռուքեին:
Հանդիպմանը մասնակցում էին ԱԺ պատգամավորներ, կառավարության անդամներ, գիտակրթական և հասարակական կազմակերպությունների ներկայացուցիչներ:
«Ֆրանսիա-Ղարաբաղ» բարեկամության շրջանակի նախագահ Ֆրանսուա Ռոշբլուանն շատ ուրախ էր կրկին անգամ գտնվել Արցախում,նշեց, որ այցելեցին սահմանամերձ բնակավայրեր, ինչպես նաև առաջնագիծ և իր ելույթում ասաց. «Հաշվի առնելով նախորդ ամսվա իրադարձությունները` այսօր հայտարարում եմ, որ Ադրբեջանը ահաբեկչական պետություն է»: Ֆրանսուա Ռոշբլուանն ամփոփեց իր ելույթը «ԵՍ ՂԱՐԱԲԱՂՑԻ ԵՄ» արտահայտությամբ:
«Ֆրանսիա-Հայաստան» բարեկամության խմբի նախագահ Ռենե Ռուքեն իր գոհունակությունն է հայտնել Արցախում գտնվելու համար և նշել. «Ադրբեջանը ապրիլյան դեպքերից հետո փորձում էր ԵԽԽՎ-ում միակողմանի նախագծեր ներկայացնել, որոնք սակայն մերժվեցին: Կարծում եմ, մենք պետք է կրկնապատկենք մեր ջանքերը՝ տեղի ունեցածի մասին իրական տեղեկատվություն մատուցելու համար»,-ընդգծել է Ռենե Ռուքեն:
Հանդիպումն ամփոփեց Աշոտ Ղուլյանը.
«Մենք այս դահլիճում բազում հանդիպումներ ենք ունեցել և մեծ մասը մեր ֆրանսիացի գործընկերների հետ:Մեր հարաբերությունների մակարդակը թույլ է տալիս գիտակցել, որ մենք իրար հետ ենք ինչպես ուրախության, այնպես էլ մեր ժողովուրդների համար տխուր և դժվարին օրերին »: