Սույն թվականի մայիսի 21-22 ԼՂՀ Ազգային Ժողովի նիստերի դահլիճում Հայաստանի Հանրապետական կուսակցության նախաձեռնությամբ տեղի էր ունեցել Հայկական քաղաքական կուսակցությունների երկրորդ ֆորումը:
Մինչ ֆորումի պաշտոնական բացումը մասնակիցները մեկ րոպե լռությամբ հարգեցին արցախյան հերոսամարտում զոհված տղաների և խաղաղ բնակչության հիշատակը:
Միջոցառմանը, որին ներկա էին ԼՂՀ ԱԺ նախագահ Աշոտ Ղուլյանը և ԼՂՀ վարչապետ Արայիկ Հարությունյանը, հրավիրված էին ՀՀ և ԼՂՀ Ազգային ժողովում ներկայացված քաղաքական կուսակցությունների ներկայացուցիչներ:
Ֆորումին բացման խոսքով հանդես է եկել ՀՀԿ նախագահի տեղակալ Արմեն Աշոտյանը: Այնուհետ մասնակիցներին իրենց ուղերձներով դիմեցին ՀՀ և ԼՂՀ նախագահներ Սերժ Սարգսյանը և Բակո Սահակյանը:
Ֆորումին ելույթով հանդես եկավ Երևանի Վ. Բրյուսովի անվան պետական լեզվահասարակագիտական համալսարանի ՅՈՒՆԵՍԿՕ-ի մարդու իրավունքների և ժողովրդավարության և եվրոպագիտության ամբիոնի վարիչ Տիգրան Թորոսյանը:
«Այս երկրորդ ղարաբաղյան պատերազմը էապես տարբերվում է առաջին պատերազմից: Երկրորդը միջպետական պատերազմ էր, առաջինը` իմ կարծիքով հայրենիքի պաշտպանություն էր, դա բանակների պատերազմ չէր…Այսօր ապրիլի I օրերին այս պատերազմը առանձնացավ հենց դրանով, որ ակնհայտորեն երևաց , որ պետությունը կռվում է պետության հետ: Սա պիտի կարևոր նախանշան լինի մեր կյանքի մնացած ոլորտներում վերանայումների լուրջ աշխատանքների համար», – նշել է նա՝ կարևորելով կուսակցությունների նշանակությունը պետության համար:
Միջոցառմանը ելույթ է ունեցել նաև Հայաստանի Քրիստոնեա-դեմոկրատական միության ղեկավար Խոսրով Հարությունյանը: «Կուսակցության նպատակը պետք է լինի իր գաղափարախոսության ադեկվատ հանրային կյանքը կազմակերպելը», – ընդգծել էր նա:
Երկրորդ նիստի թեման էր Կուսակցությունների դերը արտաքին քաղաքականության մեջ: Նիստին ելույթով հանդես է եկել միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանը: Նրա խոսքով, ապրիլյան իրադարձությունները ստիպում են մեզ վերանայել ամեն ինչ, այդ թվում և քաղաքական համակարգում և գիտակցել կատարված քայլերն ու անելիքները, այդ թվում կուսակցությունների կողմից:
«Կուսակցությունները, որպես քաղաքական կյանքի կազմակերպման, այնուամենայնիվ միակ և ամենապրոֆեսիոնալ միավորներ, արտաքին քաղաքականության ոլորտում պետք է օգտագործեն ողջ պոտենցիալը, կարողությունները զարգացնելու և այլ նպատակների համար», – հավելեց Սաֆարյանը.«Եթե մենք հերթական անգամ կանգնելու ենք պատերազմի նախաշեմին, ուրեմն պիտի խոստովանենք, որ մեր քաղաքականությունը ճիշտ չի եղել, այլապես մենք այդ իրավիճակում չէինք հայտնվի» :
Ելույթների վերջում տեղի ունեցավ մտքերի փոխանակում:
Մայիսի 22-ին ֆորումի երկրորդ օրը, ֆորումի մասնակիցներին ողջունեց ԼՂՀ ԱԺ նախագահ Աշոտ Ղուլյանը: «Երևի թե այս աշխատանքը նաև մեզ հուշում է, որ այսպիսի միջոցառումներ Արցախում` Ստեփանակերտում, անցկացնելու գաղափարը ինքնին ճիշտ է, արդարացված է», նշել է նա:
«Մեր պատասխանատվությունը կհերիքի, որպեսզի առաջիկա տարիներին մենք մեր գործունեությամբ, քաղաքական մեր ակտիվությամբ կարողանանք նաև բավարարել այն բոլոր սպասումները, որ կա հանրային քաղաքական շրջանակների մեջ»,- հավելեց ԼՂՀ ԱԺ նախագահը:
Ա.Ղուլյանը նշեց, որ երկու տարի առաջ Արցախի ժողովրդավարական կուսակցությանը հաջողվել է լուրջ կապեր հաստատել Եվրոպայի Ազատ դաշինքի քաղաքական ընտանիքի հետ:
Այդ համատեքստում նա ընդգծեց, որ Հայաստանի քաղաքական դաշտի դերակատարները անպայման պետք է հաշվի առնեն միջազգային գործընթացներում արցախյան քաղաքական կուսակցությունների մասնակցության հնարավորությունը, նաև գործնական մակարդակում:
«Ղարաբաղյան հիմնախնդրի հետ կապված մեր կուսակցությունները բոլորն էլ պատրաստ են իրենց մասնակցությունը բերեն թե´ ներքաղաքական քննարկումների մեջ հստակեցնելու համար մեր բոլոր տակտիկական խնդիրները, թե´ նաև ընդհանուր միջազգային հարթակներում մեր ռազմավարական խնդիրը ԼՂՀ միջազգային ճանաչմանը հասնելու նպատակով», -եզրափակել է Ա. Ղուլյանը: